久違了呢個我同大家分享我自認識意佬以嚟，所有唔東唔西，中西合璧人生經歷嘅講故仔平台。這陣子我為咗籌備兩岸嘅婚禮，忙到幾乎連電話擺咗去邊都唔知。我知道，當新娘子應該要有充足睡眠，均衡飲食，作息定時，做吓facial浸吓spa，但往往想做同做到係兩回事。
事前已知道到埗後會忙到on call48小時咁款，但估唔到可癲到一個點，出嫁前一晚，瞓得1個鐘！自怪連我遠道而來至親嘅屋企人、親戚、好友，都未能好好款待佢哋。
感恩身邊總有明白我嘅人，起碼喺我百忙千忙之中，讓我感受到我唔係一味自己孤零零獨個兒作戰。
上星期六，藍天白雲、花草樹木都盛開。微風、未致於幫到著了6層紗嘅我散熱，感覺同焗磨菇冇乜分別。
因為村莊裏有好多習俗、儀式要跟從，正所謂各處鄉村各處例，村民普遍都同返村內人結婚，減少文化差異帶嚟嘅爭執。所以我同意佬嘅婚事一早已喺村內街知巷聞。
我從來冇公主夢、但呢一日，我就好似成了女主角一樣，除咗親朋戚友外，好多村民亦走到街上為我同意佬喝采，除咗大讚我呢個中國娃娃靚靚外，都替我倆可為愛而突破所謂傳統習俗嘅障礙而高興，連啲三姑六婆都話見證呢個亞洲妹嘅勇氣實在難能可貴😆
阿爸阿媽，我嫁喇！嫁俾一個雖然好木訥但心裏總有你倆嘅女婿，嫁俾一個同老豆一樣咁有擔當嘅男人。
執子之手 與子偕老。
我哋都會好似你哋咁，愛到天荒地老。
Search